Главниот дизајнер на Jaguar Land Rover, Гери МекГоверн, објави дека по 22 години верност, решил да си замине од својата позиција во компанијата, и да отвори сопствена консултантска куќа.
Истата вест беше потврдена и од менаџментот на JLR кои преку меморандум пратен до 32.000 вработени во компанијата, јавно му се заблагодарија на својот досегашен дизајнер и му посакаа среќа во неговите нови предизвици.
МекГоверн, во својата 22 годишна работа во JLR кој работи под капата на Индиската Групација TATA, беше особено познат и признат по воскреснувањето на Land Rover Defender и ја одржа популарноста на Range Rover палетата на возила.
Но ако се загребе малку повеќе под површината и куртоазните пораки, факт е дека зад името на Мекговерн, се крие и во најмала рака кажано контроверзниот проект Type 00 Concept.
Тој дизајнираше целосно електричен автомобил со две врати и со цена од 128.000 фунти, на чија предна хауба не беше поставен препознатливата дива мачка, а за промотивниот автомобил употреби светло розова боја, која ги фрапираше поконзервативните фанови на брендот.
Рекламната кампања и возилото во розева боја, налета на ножот на конкурентите, меѓу кои се огласи и Елон Маск, фрлајќи дрва и камења по оваа “woke” егзибиција. Розевиот автомобил, во негативен контекст го коментираше дури и Американскиот претседател Трамп.
Кон крајот на минатата година се проширија вести дека МекГоверн дури бил и отпуштен и придружен надвор од зградата од страна на обезбедувањето, но оваа вест беше демантирана од менаџментот.
На крајот, останува фактот дека МекГоверн го напушта дизајнерското кормило на Jaguar Land Rover, и своите идеи и креации ќе продолжи да ги работи за своја сметка, преку сопственото дизајнерско студио.
