Додека нашите градски власти, со години ја влечкаа набавката на нови градски автобуси, Атина прави сериозна обнова на својот возен парк и досега набави 1.076 нови автобуси.
Со тоа, за 80% е целосно обновен возниот парк.
Во последната набавка биле опфатени 125 електрични автобуси, 13 се погонувани од природен гас и се набавени од Iveco, а 67 автобуси се на компресиран природен гас (CNG) од производителот – Menarini.
Паралелно со набавката на автобусите, се врши регрутација и на нови возачи кои ќе ја оперираат новата флота.
Во првата фаза се дава можност да аплицираат и оние кои немаат валидна возачка дозвола, а се потенцира дека истите ќе може бесплатно да бидат обучувани и да полагаат за дозвола.
Според извештаите од терен, веќе се чувствува сериозно подобрување на квалитетот на услугата, а времето на чекање автобус, од 19 е смалено на само 8 минути.
До 2028 година ќе бидат набавени уште 617 нови автобуси, кои ќе бидат финансирани со европски и со сопствени, национални, извори.
