VW ја најави сосема новата, трета генерација на најпродаваниот модел во моментот – Tiguan, малиот SUV кој од официјалното лансирање (2007) се продаде во повеќе од 7,6 милиони единици.
Новиот Tiguan се очекува во дилерствата во првиот квартал од следната 2024 година.
Моделот ќе пристигне со нови хибридни погонски единици, кои имаат автономија на електрично возење од 100 километри.
Во сите е-хибридни модели, полнењето ќе биде побрзо, а ќе биде возможно и брзо DC полнење.
Инфотејнмент матрикс
Во ентериерот е вградена новата четврта генерација на модуларниот инфотејнмент матрикс, кој нуди многу информации и можности за користење на бројни апликации. Модулите вклучуваат дигитален кокпит (инструменти со антирефлекс облога) во форма на таблет – поставен хоризонтално (landscape). Инфотејнмент екранот е од 15 инчи (38 сантиметри) со нова структура на менито, како и хед-ап дисплеј (проекција на ветробранското стакло).
Мотори
Новиот Tiguan ќе биде опремен со турбо дизел мотори (TDI), турбо бензински мотори (TSI), благи хибриди со турбо бензински мотор (eTSI) и со плаг-ин хибридни системи (eHybrid), кои во иднина ќе одат спарени само со автоматските менувачи (DSG).
Менувањето брзини ќе се прави со прекинувач поставен на воланот од десната страна (види ја сликата подолу), како кај Volkswagen ID и новиот Passat.
Моделот ќе биде опремен и со IQ.LIGHT HD matrix предни светла.
Багажник
Во споредба со претходникот, багажникот на Tiguan е пораснат за 3 сантиметри, а вкупниот капацитет е пораснат на 652 литри.
