Moсква повеќе нема да купува автобуси на дизел

41

Според градоначалникот на Москва руската метропола повеќе нема да купува дизел автобуси, освен за одредени специјални транспортни цели.

Во градот, до крајот на 2021 година активно ќе оперираат 1.000 автобуси на електричен погон, кои во минатите 2,5 години веќе поминале 40 милиони километри и превезле 90 милиони патници.

За да може да функционира градскиот превоз исклучиво на електричен погон, во градот, секоја година ќе бидат поставувани по 200 пункта за полнење на батериите.

Улогата на електричните автобуси во градскиот превоз е секако примарно насочена кон намалување на загадувањето. Според направената анализа на најголемиот државен оператор Мосготранс, само во 2020 година со користењето на електричните автобуси било намалено загадувањето на воздухот за 40 илјади тони.

Само еден дизел автобус, заменет со електричен, значи 60,7 тони помалку CO2 во атмосферата на годишно ниво.

Околу 40% од вкупната флота на електрични автобуси ќе се произведуваат во SVARZ, фабрика за автобуси во Москва во сопственост на Мосготранс (најголемиот државен превозник на патници во градскиот сообраќај).

Првите автобуси на електричен погон од SVARZ се веќе произведени и оперираат во Москва.