Менаџери / Лидери
Теоријата на менаџментот, во минатото правеше дистинкција помеѓу термините менаџер и лидер.
Притоа, најчесто – лидерот ја имаше задачата да ги постави организациските цели, а менаџерот да ги спроведе на дело. Но денес, поради еволуцијата на технологијата, процесите и интеракцијата помеѓу луѓето, овие две функции полека се спојуваат. Менаџерот нема алтернатива. За да ги максимизира посветеноста и резултатите кај вработените тој мора да располага со квалитетни лидерски вештини.
“Лидерството е уметност, да натерате друг да ви ја заврши работата, но затоа што тој тоа го сака.” Двајт Д. Ајзенхауер, престедател на САД
Вообичаено – лидерите ја скицираат визијата, патеката по која одредена организација ќе се движи во иднина. Тие обично ефективно одговараат на можностите, кризните ситуации и промената. Наспроти тоа, менаџерите се вклучени во секодјневните административни активности за да се остварат одредени цели, како што се на пример поставувањето и следењето на буџетите, плановите и и слично.
Конкретно, Лидерите :
- Ги дефинираат главните насоки на организацијата
- Влијаат на луѓето во остварување на целите
- Се залагаат за ефективност
- Ја охрабруваат промената
- Олеснуваат носење одлуки
- Ги подредуваат луѓето
- Создаваат системи и бараат простор за подобрување
Менаџерите, пак, :
- Планираат до детали
- Ги охрабруваат луѓето да остваруваат
- Целат кон ефикасност
- Реагираат на промената
- Носат одлуки
- Ги организираат луѓето
- Се грижат ресурсите да се алоцирани и доволни.
Бројните истражувања покажуваат дека е неопходен баланс помеѓу лидерството и менаџментот. Како ќе биде поставена рамнотежата помеѓу двете улоги, зависи од големината и комплексноста на организацијата, како и од индустријата во која истата работи.
Според врвниот консултант за менаџмент Џон Котер, менаџментот е процес кој овозможува организациите да функционираат, додека лидерството е задача која бара вработените да се инспирираат и мотивираат. Менаџерите помагаат организацијата да се справи со комплексности, додека лидерите и овозможуваат да одговори на промените. Па, како што организацијата со текот на времето еволуира, така ќе еволуира и функцијата лидер / менаџер. Котер оваа аналогија ја доловува и во армијата. Така, додека државата е во мирнодопска состојба, на армијата за да функционира и се доволни менаџери на сите позиции и добар лидер на врвот од хиерархијата. Но ако државата влезе во војна, на армијата и се неоопходни добри лидери на секоја позиција.
